പിസി ജോര്‍ജിനെതിരെ കേസെടുക്കാന്‍ വനിതാ കമ്മീഷന്‍

പിസി ജോര്‍ജിനെതിരെ കേസെടുക്കാന്‍ വനിതാ കമ്മീഷന്‍

കൊച്ചി: നാക്കിന് ലൈസന്‍സില്ലാത്തതിന്റെ പേരില്‍ കുപ്രസിദ്ധനാണ് പൂഞ്ഞാര്‍ എംഎല്‍എ പിസി ജോര്‍ജ്. പിസിയുടെ ഈ സ്വഭാവം കേരളത്തിന് പരിചയമുണ്ടെങ്കിലും ക്രൂരമായി ആക്രമിക്കപ്പെട്ട നടിയെ അപമാനിച്ചത് മലയാളികള്‍ ഞെട്ടലോടെയാണ് കേട്ടത്. ഒടുവില്‍ പൂഞ്ഞാര്‍ സിംഹത്തിന് പണിയും കിട്ടി. വനിതാ കമ്മീഷനാണ് പിസി ജോര്‍ജിന്റെ എല്ലില്ലാത്ത നാക്കിന് പൂട്ടിടാന്‍ രംഗത്ത് എത്തിയിരിക്കുന്നത്. എംഎല്‍എയ്‌ക്കെതിരെ കേസെടുക്കാനാണ് വനിതാ കമ്മീഷന്റെ നീക്കം.

നടിയെ ആക്രമിക്കാന്‍ ഗൂഢാലോചന നടത്തിയ കേസില്‍ ദിലീപ് അറസ്റ്റിലായത് മുതല്‍ പിസി ജോര്‍ജ് നടനൊപ്പമാണ്. നടനെ പിന്തുണയ്ക്കുന്നതിനൊപ്പം ഇരയായ നടിയെ അപമാനിക്കാനും പിസി ജോര്‍ജ് ഒട്ടും മടി കാണിച്ചില്ല. പല തവണ ഈ അപമാനം പിസി ജോര്‍ജ് തുടര്‍ന്നു.അഭിമുഖങ്ങളിലും ചാനല്‍ ചര്‍ച്ചകളിലും പത്രസമ്മേളനത്തിലുമെല്ലാം പിസി ജോര്‍ജ് നടിയെ അപമാനിച്ച് സംസാരിക്കുകയുണ്ടായി. ഇത്തരം പരാമര്‍ശങ്ങള്‍ സ്ത്രീത്വത്തെ പരുക്കേല്‍പ്പിക്കുന്നതാണ് എന്ന് വനിതാ കമ്മീഷന്‍ അധ്യക്ഷ എംസി ജോസഫൈന്‍ നിരീക്ഷിച്ചു.

പിസി ജോര്‍ജിനെതിരെ കമ്മീഷന് പരാതിയൊന്നും ലഭിക്കാത്ത സാഹചര്യത്തില്‍ സ്വമേധയാ ആണ് കേസെടുത്തിരിക്കുന്നത്. എംഎല്‍എ കൂടിയായ പിസി ജോര്‍ജിന്റെ മൊഴിയെടുക്കാന്‍ അനുവദിക്കണം എന്നാവശ്യപ്പെട്ട് വനിതാ കമ്മീഷന്‍ സ്പീക്കര്‍ക്ക് കത്ത് നല്‍കും. തുടക്കം മുതല്‍ക്കേ ദിലീപ് നിരപരാധി ആണെന്ന് പറയുന്ന പിസി ജോര്‍ജ് ആലപ്പുഴയില്‍ വിളിച്ച് ചേര്‍ത്ത വാര്‍ത്താ സമ്മേളനത്തിലാണ് ആദ്യം നടിയെ ആക്രമിച്ച് വിവാദ പ്രസ്താവന നടത്തിയത്. നടി ക്രൂരമായി ആക്രമിക്കപ്പെട്ടതിന് തെളിവില്ലെന്ന് പിസി ജോര്‍ജ് പറയുകയുണ്ടായി.

ദില്ലിയിലെ നിര്‍ഭയയേക്കാള്‍ ക്രൂരമായി നടി ആക്രമിക്കപ്പെട്ടിട്ടുണ്ട് എന്ന് പോലീസ് ഹൈക്കോടതിയില്‍ പറയുകയുണ്ടായി. നിര്‍ഭയയേക്കാള്‍ ക്രൂരമാണ് പീഡനമെങ്കില്‍ നടി തൊട്ടടുത്ത ദിവസം അഭിനയിക്കാന്‍ പോയതെങ്ങനെ എന്ന് പിസി ജോര്‍ജ് ചോദിച്ചതിനെതിരെ ശക്തമായ വിമര്‍ശനമാണ് ഉയര്‍ന്ന് വന്നത്.

Leave a Reply

Your email address will not be published.