പെട്രോള്‍ വില: ജനങ്ങളെ കൊള്ളയടിക്കാന്‍ മോദി കോര്‍പ്പറേറ്റുകളെ കയറഴിച്ച് വിട്ടിരിക്കുന്നു – ഹമീദ് വാണിയമ്പലം

പെട്രോള്‍ വില: ജനങ്ങളെ കൊള്ളയടിക്കാന്‍ മോദി കോര്‍പ്പറേറ്റുകളെ കയറഴിച്ച് വിട്ടിരിക്കുന്നു – ഹമീദ് വാണിയമ്പലം

തിരുവനന്തപുരം: അനിയന്ത്രിതമായി പെട്രോള്‍, ഡീസല്‍ നിരക്ക് വര്‍ദ്ധിപ്പിച്ച് ജനങ്ങളെ ആവും വിധം കൊള്ളയടിക്കാന്‍ മോദി സര്‍ക്കാര്‍ കോര്‍പ്പറേറ്റുകളെ കയറഴിച്ച് വിട്ടിരിക്കുകയാണെന്ന് വെല്‍ഫെയര്‍ പാര്‍ട്ടി സംസ്ഥാന പ്രസിഡണ്ട് ഹമീദ് വാണിയമ്പലം പ്രസ്താവിച്ചു. അന്താരാഷ്ട്ര വിപണിയില്‍ ക്രൂഡോയിലിന് വില കുറഞ്ഞ നിരക്കിലായിട്ടും കഴിഞ്ഞ ഒരുമാസത്തിനിടെ മാത്രം പെട്രോളിന് 4 രൂപയിലധികവും ഡീസലിന് 3 രൂപയിലധിവും വില വര്‍ദ്ധിച്ചു.

ദിവസവും പെട്രോള്‍-ഡീസല്‍ നിരക്കുകള്‍ പുനര്‍ നിര്‍ണയിക്കാന്‍ പെട്രോളിയം കമ്പനികള്‍ക്ക് മോദി സര്‍ക്കാര്‍ നല്‍കിയ അനുമതിയുടെ മറവില്‍ ദിനേനെ ചാര്‍ജ്ജില്‍ ചെറിയ വര്‍ദ്ധന വരുത്തിയാണ് ജനങ്ങളറിയാതെ കൊടും ചൂഷണം നടക്കുന്നത്. സര്‍ക്കാര്‍ കോര്‍പ്പറേറ്റുകളുടെ കൂട്ടിക്കൊടുപ്പുകാരായി മാറിനില്‍ക്കുന്നു.

ദിവസവും വില പുനര്‍ നിര്‍ണ്ണയിക്കുന്ന രീതി അവസാനിപ്പിക്കുകയും പെട്രോള്‍-ഡീസല്‍ വില നിര്‍ണ്ണയാവകാശം സര്‍ക്കാര്‍ കമ്പനികളില്‍ നിന്ന് തിരിച്ചു പിടിക്കുകയും വേണം. പെട്രോല്‍ വില 40 രൂപയാക്കുമെന്ന് വാഗ്ദാനം ചെയ്ത മോദി ജനങ്ങളെ പച്ചയായി വഞ്ചിക്കുകയായിരുന്നു. ജനങ്ങളൊന്നാകെ ഈ കൊള്ളക്കെതിരെ രംഗത്ത് വരണം. മോദി സര്‍ക്കാറിന്റെയും കോര്‍പ്പറേറ്റുകളുടെയും സംയുക്ത കൊള്ളക്കെതിരെ കേരളത്തിലെ എല്ലാ നിയോജക മണ്ഡലങ്ങളിലും എണ്ണകമ്പനികളുടെ ഔട്ട്ലെറ്റുകളുടെ മുന്നില്‍ വെല്‍ഫെയര്‍ പാര്‍ട്ടി പ്രതിഷേധം സംഘടിപ്പിക്കുമെന്നും അദ്ദേഹം പറഞ്ഞു.

 

Leave a Reply

Your email address will not be published.