CLOSE

ആരോഗ്യമുള്ള താടിക്ക് വേണ്ട പരിചരണം

ഇടതൂര്‍ന്ന സുന്ദരമായ താടി ഉണ്ടെങ്കില്‍ നന്നായി പരിചരിക്കേണ്ടതും അനിവാര്യമാണ്. താടി പരിചണത്തില്‍ ഏറ്റവും പ്രാധാന്യം നല്‍കേണ്ടത് വൃത്തിക്കാണ്. പൊടിയും വിയര്‍പ്പും അടിഞ്ഞു കൂടി നിരവധി പ്രശ്‌നങ്ങള്‍ താടിക്കാര്‍ അഭിമുഖീകരിക്കേണ്ടതായി വരും. ഇതൊന്നും ശ്രദ്ധിച്ചില്ലെങ്കില്‍ അലര്‍ജിയും താടിക്കൊഴിച്ചിലുമായിരിക്കും കാത്തിരിക്കുന്നത്. ആരോഗ്യമുള്ള താടിക്ക് ഒരിക്കലെങ്കിലും സ്പാ ചെയ്യുന്നത് നല്ലതാണ്. ഒരു സ്‌റ്റൈലിസ്റ്റിന്റെ സഹായം ഇതിനായി തേടാം. 5 ഘട്ടങ്ങളാണ് ഒരു സ്പാ ട്രീറ്റ്‌മെന്റിലുള്ളത്.

ആദ്യ ഘട്ടം അനുയോജ്യമായ ക്രീം താടിയില്‍ തേച്ചു പിടിപ്പിക്കുക എന്നതാണ്. ക്രീമുകള്‍, ഷാംപൂ, ഓയിലുകള്‍ എന്നിവയില്‍ ഏതു വേണമെങ്കിലും ഉപയോഗിക്കാം. താടിയുടെ സ്വഭാവം അനുസരിച്ച് വേണം ഇതു തിരഞ്ഞെടുക്കാന്‍. താരന്‍ അകറ്റാനുളളത്, വളര്‍ച്ചയെ ത്വരിതപ്പെടുത്തുന്നത്, ഇഴകള്‍ക്ക് തിളക്കവും മിനുസവും, വേരിന് ബലം എന്നിങ്ങനെ പല സ്വഭാവത്തിലുള്ള ക്രീമുകളുണ്ട്. ബ്രഷ് ഉപയോഗിച്ച് ആവശ്യമുള്ള അളവില്‍ ക്രീം താടിയില്‍ തേയ്ക്കണം.

താടിക്ക് ആവി കൊടുക്കുകയാണ് രണ്ടാം ഘട്ടം. ചുളിഞ്ഞു കിടക്കുന്ന ചര്‍മം കൂടുതല്‍ വികസിക്കാന്‍ ഇതു സഹായിക്കും. വേരുകള്‍ തുറക്കും. ക്രീമിന് കൂടുതല്‍ ഓയിലി സ്വഭാവം ലഭിക്കാന്‍ ഇത് സഹായിക്കും. ഇങ്ങനെ 15 മിനിറ്റോളം ആവി കൊടുക്കണം.

ഇതിനുശേഷം നന്നായി മസാജ് ചെയ്യണം. വട്ടത്തില്‍ കറക്കിയാണ് മസാജ് ചെയ്യേണ്ടത്. താടിയിഴകഴിലും വേരുകളിലുമൊക്കെ നന്നായി ക്രീം പിടിക്കണം. 10 മിനിറ്റോളം മസാജ് ചെയ്യുക.

സാധാരണ വെള്ളത്തില്‍ താടി നന്നായി കഴുകണം. ക്രീമിന്റെ അംശമൊന്നും താടിയില്‍ അവശേഷിക്കരുത്. സമയമെടുത്ത് പതുക്കെ വേണം കഴുകാന്‍.

വെള്ളം നന്നായി ഒപ്പിയെടുത്തശേഷം താടിയിഴകള്‍ക്കിടിയില്‍ വിരലോടിക്കുക. അപ്പോള്‍ ഒന്നിച്ചിരിക്കുന്ന താടികള്‍ വേര്‍പ്പെടും. താടി നല്ല മിനുസത്തില്‍ ആയിരിക്കും എന്നതിനാല്‍ ഡ്രയര്‍ ഉപയോഗിച്ച് ഉണക്കിയെടുക്കുക.

Leave a Reply

Your email address will not be published. Required fields are marked *