CLOSE

മത്സ്യകൃഷിയില്‍ വിജയം കൈവരിച്ച് മുന്‍ പ്രവാസി;’ രാവണേശ്വരം പൊടി പള്ളത്തെ എം. ശ്രീധരനാണ് വീട്ടുവളപ്പില്‍ മത്സ്യകൃഷി ചെയ്ത് നല്ല വിളവ് ലഭിച്ചത്

Share

മത്സ്യകൃഷിയില്‍ വിജയം കൈവരിച്ച് മുന്‍ പ്രവാസി.’ രാവണേശ്വരം പൊടി പള്ളത്തെ എം. ശ്രീധരനാണ് വീട്ടുവളപ്പില്‍ മത്സ്യകൃഷി ചെയ്ത് നല്ല വിളവ് ലഭിച്ചത്. 24 വര്‍ഷത്തെ പ്രവാസ ജീവിതം നയിച്ചതിനുശേഷം നാട്ടിലെത്തി തെങ്ങ്, വാഴ, കവുങ്ങ് തുടങ്ങി മറ്റ് പച്ചക്കറി കൃഷികള്‍ ചെയ്തു വരുന്നതിനിടയിലാണ് ശ്രീധരന്‍ യാദൃശ്ചികമായി മത്സ്യ കൃഷിയിലേക്ക് തിരിഞ്ഞത്. സുഭിക്ഷ കേരളം പദ്ധതിയുടെ ഭാഗമായി അജാനൂര്‍ പഞ്ചായത്തിന്റെയും ഫിഷറീസ് ഡിപ്പാര്‍ട്ട്‌മെന്റിന്റെയും സഹായത്തോടെയാണ് മത്സ്യ കൃഷി ചെയ്യുന്നത്. ഒരു പ്രോജക്ടിന് ഒരു ലക്ഷത്തി 23 ആയിരം രൂപയാണ് ഫിഷറീസ് ഡിപ്പാര്‍ട്ട്‌മെന്റ് കണക്കാക്കുന്നത്. ഇതില്‍ 40 ശതമാനം സബ്‌സിഡിയായി കര്‍ഷകന് ലഭിക്കുന്നു. ഇരുപത്തി ഒന്‍പതിനായിരം രൂപ പഞ്ചായത്തിന്റെയും 16400രൂപ ഫിഷറീസ് ഡിപ്പാര്‍ട്ട്‌മെന്റ്‌ന്റെയും. ഇതിന് ആവശ്യമായ മത്സ്യകുഞ്ഞുങ്ങളെ ഫിഷറീസ് ഡിപ്പാര്‍ട്ട്‌മെന്റാണ് നല്‍കുന്നത്. 10 മീറ്റര്‍ നീളവും എട്ടു മീറ്റര്‍ വീതിയും രണ്ടര മീറ്റര്‍ ആഴവുമുള്ള കൃത്രിമ കുളം നിര്‍മിച്ചാണ് മത്സ്യ കൃഷിക്കായി പദ്ധതി തയ്യാറാക്കുന്നത്. ഇതിലേക്ക് 1000 ആസാം വാള കുഞ്ഞുങ്ങളെയും 1000 തിലോപ്പിയ കുഞ്ഞുങ്ങളെയും നിക്ഷേപിച്ച് പിന്നീട് തീറ്റയും നല്‍കിയാണ് ശ്രീധരന്‍ ഇപ്പോള്‍ മത്സ്യ കൃഷിയില്‍ നൂറുമേനി കൊയ്‌തെടുത്തിരിക്കുന്നത്. ഏകദേശം ആറ് മാസമാണ് ഇവയുടെ വിളവെടുപ്പ് കാലം എങ്കിലും കോവിഡ് പ്രതിസന്ധി നിലനില്‍ക്കുന്നത് മൂലം കഴിഞ്ഞ മാര്‍ച്ചില്‍ മത്സ്യകുഞ്ഞുങ്ങളെ നിക്ഷേപിച്ച ശേഷം ഇപ്പോള്‍ ഡിസംബറിലാണ് ശ്രീധരന്‍ വിളവെടുപ്പ് നടത്തിയിരിക്കുന്നത്. അതുകൊണ്ടുതന്നെ സാമാന്യം വലുപ്പമുള്ള മീനുകളാണ് ശ്രീധരന് ലഭിച്ചിരിക്കുന്നത്. തന്റെ കൃഷിക്കാവശ്യമായ പ്രോത്സാഹനവുമായി ഭാര്യ എം. ശാന്തയും മക്കളായ എം. സജിത്ത്, എം. സന്ദീപ്,കൂടാതെ മരുമക്കളായ ഷിബിന സജിത്ത്, ഗീതു സന്ദീപ് എന്നിവരും കൂടെയുണ്ടെന്ന് ശ്രീധരന്‍ പറയുന്നു. എന്നാലും മത്സ്യവിപണി ക്ക് വളരെ പ്രയാസം നേരിടുന്നു എന്നും ഇതിന് അധികാരികളുടെ ഭാഗത്തുനിന്ന് ഇടപെടലുകള്‍ ഉണ്ടാവണമെന്നും ശ്രീധരന്‍ സൂചിപ്പിച്ചു. മത്സ്യകൃഷിയുടെ വിളവെടുപ്പ് അജാനൂര്‍ പഞ്ചായത്ത് പ്രസിഡണ്ട് ടി.ശോഭ നിര്‍വഹിച്ചു. അജാനൂര്‍ പഞ്ചായത്ത് ഇരുപത്തിമൂന്നാം വാര്‍ഡ് മെമ്പര്‍ എം. ബാലകൃഷ്ണന്‍ അധ്യക്ഷത വഹിച്ചു. ബ്ലോക്ക് പഞ്ചായത്ത് മെമ്പര്‍ എം. ജി.പുഷ്പ, മുന്‍ പഞ്ചായത്ത് പ്രസിഡണ്ട് പി. ദാമോദരന്‍, പൊതു പ്രവര്‍ത്തകരായ ടി. ശശിധരന്‍,പത്മ പവിത്രന്‍,ഫിഷറീസ് വകുപ്പിന്റെ പ്രൊമോട്ടര്‍ മാരായ കെ. ശരണ്യ, യു.നദാഷ എന്നിവര്‍ സംസാരിച്ചു. അജാനൂര്‍ പഞ്ചായത്തിലെ മത്സ്യ കര്‍ഷകര്‍ക്ക് ഫിഷറീസ് ഡിപ്പാര്‍ട്ട്‌മെന്റിന്റെ ഭാഗത്തുനിന്ന് എല്ലാ സഹായങ്ങളും ചെയ്തു കൊടുക്കുന്നുണ്ടെന്ന് പ്രമോട്ടര്‍ ശരണ്യ പറഞ്ഞു.

Leave a Reply

Your email address will not be published. Required fields are marked *