CLOSE

സന്ദീപിന്റെ കൊലപാതകത്തില്‍ പ്രതികള്‍ക്കായി പോലീസ് കസ്റ്റഡി അപേക്ഷ സമര്‍പ്പിച്ചു

Share

കൊല്ലം: സിപിഐഎം പെരിങ്ങറ ലോക്കല്‍ സെക്രട്ടറി സന്ദീപിന്റെ കൊലപാതകത്തില്‍ പ്രതികള്‍ക്കായി പോലീസ് കസ്റ്റഡി അപേക്ഷ സമര്‍പ്പിച്ചു. തെളിവെടുപ്പിനും ശാസ്ത്രീയ പരിശോധനകള്‍ക്കുമായി 5 ദിവസത്തേക്കാണ് പ്രതികളെ കസ്റ്റഡിയില്‍ ആവശ്യപ്പെട്ടിരിക്കുന്നത്. തിരുവല്ല ഫസ്റ്റ് ക്ലാസ് ജുഡീഷ്യല്‍ മജിസ്ട്രേറ്റ് കോടതി പോലീസിന്റെ അപേക്ഷ നാളെ പരിഗണിക്കും.

റിമാന്‍ഡിലുള്ള അഞ്ച് പ്രതികളെയും കോവിഡ് പരിശോധനക്ക് ശേഷം ആലപ്പുഴയിലെ ക്വാറന്റീന്‍ കേന്ദ്രത്തില്‍ താമസിപ്പിച്ചിരിക്കുകയാണ്. ഇന്ന് സിപിഐഎം സംസ്ഥാന സെക്രട്ടറി കോടിയേരി ബാലകൃഷ്ണന്‍ കൊല്ലപ്പെട്ട പിബി സന്ദീപ് കുമാറിന്റെ വീട് സന്ദര്‍ശിക്കും.

തിരുവല്ലയില്‍ സിപിഐഎം ലോക്കല്‍ സെക്രട്ടറി സന്ദീപ് കുമാറിന്റെ കൊലപാതകത്തിന് പിന്നില്‍ രാഷ്ട്രീയ വിരോധമാണെന്നാണ് റിമാന്‍ഡ് റിപ്പോര്‍ട്ട്. യുവമോര്‍ച്ച പ്രവര്‍ത്തകനായിരുന്ന ജിഷ്ണുവിന് സന്ദീപിനോട് രാഷ്ട്രീയ വിരോധവും വ്യക്തി വൈരാഗ്യവും ഉണ്ടായിരുന്നതിനാല്‍ പ്രതികള്‍ ആസൂത്രിതമായി കൊലപ്പെടുത്താന്‍ ഉറച്ചാണ് കൃത്യം നടത്തിയതെന്നും റിപ്പോര്‍ട്ടിലുണ്ട്.

വ്യക്തി വൈരാഗ്യമെന്ന് ജില്ലാ പോലീസ് മേധാവി തന്നെ പറയുമ്പോഴും കൊലപാതകം ആര്‍എസ്എസിന്റെ തലയില്‍ കെട്ടിവയ്ക്കാനാണ് സിപിഐഎം ശ്രമമെന്ന് ബിജെപി ആരോപിച്ചു. രക്തസാക്ഷിയെ കിട്ടിയതിന്റെ ആഹ്ലാദമാണ് സി പി ഐഎം നേതാക്കള്‍ക്കെന്ന് ബിജെപി സംസ്ഥാന ജനറല്‍ സെക്രട്ടറി എംടി രമേശ് പറഞ്ഞു.

Leave a Reply

Your email address will not be published.