തിരുവനന്തപുരം: ഗ്രാമ പ്രദേശങ്ങളിലെ ലഹരി കേന്ദ്രങ്ങളെ കുറിച്ചുള്ള വിവരങ്ങള്‍ പങ്കുവയ്ക്കാന്‍ ജനങ്ങള്‍ തയ്യാറാവണമെന്ന് മന്ത്രി എം ഗോവിന്ദന്‍. ഇത്തരം സാമൂഹ്യ വിരുദ്ധരെ എക്സൈസിന്റെയും പോലീസിന്റെയും മുന്നില്‍ എത്തിക്കാന്‍ ജനങ്ങള്‍ തയ്യാറാകണമെന്നും, ലഹരിക്കെതിരെ പോരാടാന്‍ ഒരുമിച്ചു നില്‍ക്കണമെന്നും മന്ത്രി പറഞ്ഞു.
‘വാര്‍ഡ് തലത്തില്‍ നിന്ന് തന്നെ പ്രവര്‍ത്തനങ്ങള്‍ ആരംഭിക്കണം. ലഹരി വസ്തുക്കളില്‍ ചെറിയൊരു ശതമാനം മാത്രമാണ് എക്സൈസും പോലീസും പിടിച്ചെടുക്കുന്നത്’, കണ്ണൂരില്‍ ലഹരി വിമുക്ത ജനകീയ ക്യാമ്പയിന്റെ ജില്ലാതല യോഗം ഉദ്ഘാടനം ചെയ്തുകൊണ്ട് എം ഗോവിന്ദന്‍ പറഞ്ഞു.
അതേസമയം, സംസ്ഥാനത്ത് ലഹരിമാഫിയ പിടിമുറുക്കുന്നുണ്ടെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. മന്ത്രിയുടെ പ്രസ്ഥാവനയും ഇത് തന്നെയാണ് സൂചിപ്പിക്കുന്നത്.