CLOSE

രാജ്യാന്തര ‘ഇന്‍ഡീ’ സംഗീതോത്സവത്തിന്റെ ലോഗോ പ്രകാശനം ചെയ്തു

Share

ചരിത്രത്തില്‍ ആദ്യമായി കേരളത്തില്‍ നടക്കാന്‍പോകുന്ന ഇന്റര്‍നാഷണല്‍ ഇന്‍ഡീ മ്യൂസിക് ഫെസ്റ്റിവലിന്റെ ലോഗോ ലോകപ്രശസ്ത ഇന്‍ഡ്യന്‍ ഡിസൈനറും സീനോഗ്രാഫറും ആര്‍ട്ട് ക്യുറേറ്ററുമായ രാജീവ് സേഥിയും വിശ്വചലച്ചിത്രകാരന്‍ അടൂര്‍ ഗോപാലകൃഷ്ണനും സംസ്ഥാനസര്‍ക്കാരിന്റെ ബാഹ്യസഹകരണത്തിനായുള്ള പ്രത്യേക ഉദ്യോഗസ്ഥന്‍ വേണു രാജാമണിയും ചേര്‍ന്ന് പ്രകാശനം ചെയ്തു.

2022 നവംബര്‍ 9 മുതല്‍ 13 വരെ നടക്കുന്ന ഫെസ്റ്റിവലിന്റെ വേദിയായ കോവളത്തെ കേരള ആര്‍ട്‌സ് ആന്‍ഡ് ക്രാഫ്റ്റ്‌സ് വില്ലേജിലാണ് പത്മഭൂഷണ്‍, പത്മശ്രീ സമ്മാനിതരായ മുതിര്‍ന്ന കലാകാരര്‍ ഇതിനായി ഒത്തുചേര്‍ന്നത്. ക്രാഫ്റ്റ് വില്ലേജ് സിഒഒ ശ്രീപ്രസാദ്, ഐഐഐസി ഡെപ്യൂട്ടി ഡയറക്റ്റര്‍ കെ. രാഘവന്‍ എന്നിവരും പങ്കെടുത്തു.

‘ഇന്‍ഡിപ്പെന്‍ഡന്റ് (ഇന്‍ഡീ) മ്യൂസിക്’ എന്നറിയപ്പെടുന്ന റോക്ക് സംഗീതശാഖയില്‍ വിഖ്യാതരായ വിദേശഗായകരെയും അവര്‍ നയിക്കുന്ന ബാന്‍ഡുകളെയും പങ്കെടുപ്പിച്ച് രാജ്യാന്തര സംഗീതോത്സവം ഒരുക്കുന്നത് കേരള ടൂറിസം വകുപ്പിന്റെ സ്ഥാപനമായ ക്രാഫ്റ്റ്‌സ് വില്ലേജാണ്. ഈ രംഗത്തു രാജ്യാന്തരതലത്തില്‍ സജീവമായി ഇടപെട്ടുവരുന്ന പ്രശസ്ത മാസികയായ ലേസീ ഇന്‍ഡീ മാഗസീനും (Lazie Indie Magazine) പങ്കാളിയാണ്.

മ്യൂസിക് ബാന്‍ഡുകള്‍ സ്വന്തമായി ഗാനങ്ങള്‍ രചിച്ചു സംഗീതം പകര്‍ന്ന് സുസജ്ജമായ വാദ്യോപകരണങ്ങളും ശബ്ദ-പ്രകാശവിതാന സംവിധാനങ്ങളുമായി അവതരിപ്പിക്കുന്ന ഇന്‍ഡീ മ്യൂസിക് കേരളത്തില്‍ ഇനിയും വികസിച്ചിട്ടില്ല. ഇതിനുള്ള പ്രോത്സാഹനമായിക്കൂടിയാണു മേള സംഘടിപ്പിക്കുന്നത്. രാജ്യത്തുതന്നെ സവിശേഷമായ ഈ രാജ്യാന്തരമേള പ്രതിവര്‍ഷപരിപാടി (calendar event) ആയി നടത്താനാണ് ഉദ്ദേശിക്കുന്നത്.

അഞ്ചുദിവസം നീളുന്ന ഇന്‍ഡീ ഫെസ്റ്റിവലില്‍ യുകെയില്‍നിന്നു രണ്ട്, അമേരിക്കയില്‍നിന്നു രണ്ട്, ഏഷ്യന്‍ രാജ്യങ്ങളില്‍നിന്ന് മൂന്ന് എന്നിങ്ങനെ ഏഴു വിദേശബാഡുകളും കേരളത്തില്‍നിന്നുള്ള നാലും മറ്റ് ഇന്‍ഡ്യന്‍ സംസ്ഥാനങ്ങളില്‍നിന്നുണ്ണ നാലും അടക്കം 15 ബാന്‍ഡുകള്‍ പങ്കെടുക്കും. ദിവസവും 45 മിനിറ്റ് വീതമുള്ള മൂന്ന് അവതരണങ്ങള്‍ വീതം നടക്കും.

യുകെയിലെ വിഖ്യാതനായ വില്‍ ജോണ്‍സിന്റെ മ്യൂസിക് ഓഫ് ക്രീം, അമേരിക്കയിലെ ജനപ്രിയ ഹാര്‍ഡ് റോക്ക് ഗായകന്‍ സമി ചോഫി(Sami Chohfi) യുടെ ബ്ലൂ ഹെലിക്‌സ്, മറ്റൊരു ബ്രിട്ടിഷ് ബാന്‍ഡായ RANE എന്നുതുടങ്ങി നിരവധി അന്താരാഷ്ട്രപുരസ്‌ക്കാരങ്ങള്‍ നേടിയിട്ടുള്ള ബാന്‍ഡുകളടക്കം സ്വന്തം രാജ്യങ്ങളില്‍ ഏറെ ആസ്വാദകരുള്ള ബാന്‍ഡുകള്‍ മേളയില്‍ പ്രകടനം കാഴ്ചവയ്ക്കും.

Leave a Reply

Your email address will not be published.