ഒരേ സ്വഭാവമുള്ള ഗ്രൂപ്പുകളൊക്കെ ഇനി ഒരു കുടുക്കീഴില്‍. അതിനുള്ള അപ്‌ഡേറ്റുമായാണ് ഇക്കുറി വാട്ട്‌സാപ്പ് എത്തിയിരിക്കുന്നത്. ഇനി ഗ്രൂപ്പുകള്‍ തമ്മില്‍ ബന്ധിപ്പിക്കാനാണ് പുതിയ ഫീച്ചര്‍ വാട്ട്‌സാപ്പ് അവതരിപ്പിച്ചിരിക്കുന്നത്. മെറ്റയുടെ ഉടമസ്ഥതയിലുള്ള വാട്ട്‌സാപ്പിന്റെ പുതിയ കമ്മ്യൂണിറ്റി ഫീച്ചര്‍ ആന്‍ഡ്രോയിഡിലും ഐഒഎസിലും വെബ്പതിപ്പിലും ലഭ്യമാണ്. വാട്ട്‌സാപ്പിലെ ഗ്രൂപ്പുകള്‍ തമ്മില്‍ ബന്ധിപ്പിക്കുകയാണ് ഈ ഫീച്ചര്‍ കൊണ്ട് ഉദ്ദേശിക്കുന്നത്. ഒരേ പോലെയുള്ള ഗ്രൂപ്പുകളെല്ലാം ഒരു കമ്മ്യൂണിറ്റിയ്ക്ക് കീഴില്‍ കൊണ്ടുവരാന്‍ കഴിയും എന്നതാണ് ഇതിന്റെ പ്രത്യേകത.
വാട്ട്‌സാപ്പ് കമ്മ്യൂണിറ്റീസ് ഉപയോഗിച്ച് ഒരു കൂട്ടം ഗ്രൂപ്പുകളെ ഒരു കുടക്കീഴില്‍ കൊണ്ടുവരാന്‍ കഴിയും. വാട്ട്‌സാപ്പ് ഗ്രൂപ്പുകളും കമ്മ്യൂണിറ്റികളും രണ്ടാണ്. സ്‌കൂളുകള്‍, ഓഫീസുകള്‍, ക്യാമ്ബസ് പോലെയുള്ള ഇടത്തെ ഗ്രൂപ്പുകളെ ഒന്നിച്ച് കൊണ്ടുവരാന്‍ കഴിയുമെന്നതാണ് കമ്മ്യൂണിറ്റിസിന്റെ ഗുണം. ആന്‍ഡ്രോയിഡിലും ഐഒഎസിലും ചാറ്റിന് അടുത്തായി തന്നെ കമ്മ്യൂണിറ്റീസിന്റെ ലോഗോ കാണാം. വാട്സാപ്പ് വെബില്‍ നോക്കിയാല്‍ ഏറ്റവും മുകളിലായി കമ്മ്യൂണിറ്റീസ് ലോഗോ ഉണ്ടാകും.
കമ്മ്യൂണിറ്റിസ് ക്രിയേറ്റ് ചെയ്യുന്നതെങ്ങനെ എന്ന് സംശയമുള്ളവര്‍ ഒരുപാട് കാണും. കമ്മ്യൂണിറ്റിസ് ക്രിയേറ്റ് ചെയ്യാന്‍ എളുപ്പമാണ്. വാട്ട്‌സാപ്പിലെ
കമ്മ്യൂണിറ്റീസ് ടാബ് തുറക്കുക അതിനു ശേഷം ന്യൂ കമ്മ്യൂണിറ്റീസ് തിരഞ്ഞെടുക്കണം. അടുത്തതായി കമ്മ്യൂണിറ്റിയുടെ പേരും വിവരണവും പ്രൊഫൈല്‍ ചിത്രവും നല്‍കണം. തുടര്‍ന്ന് വരുന്ന പച്ച നിറത്തിലുള്ള ‘ആരോ’ ഐക്കണ്‍ ക്ലിക്ക് ചെയ്യുക. അപ്പോള്‍ ക്രിയേറ്റ് ആകുന്ന കമ്മ്യൂണിറ്റിയ്ക്ക് കീഴില്‍ പുതിയ ഗ്രൂപ്പുകള്‍ ക്രിയേറ്റ് ചെയ്യാനാകും.
ആവശ്യമെങ്കില്‍ നിലവിലുള്ള ഗ്രൂപ്പുകളെ കമ്മ്യൂണിറ്റിയില്‍ ചേര്‍ക്കുകയും ചെയ്യാം. ഗ്രൂപ്പുകള്‍ ആഡ് ചെയ്തതിനു ശേഷം പച്ച നിറത്തിലുള്ള ചെക്ക് മാര്‍ക്ക് ബട്ടന്‍ ക്ലിക്ക് ചെയ്യണം. ഏകദേശം 50 ഗ്രൂപ്പുകള്‍ക്ക് വരെ ഒരു കമ്മ്യൂണിറ്റിയുടെ ഭാഗമാകാം. കൂടാതെ 5000 പേരടങ്ങുന്ന അനൗണ്‍സ്മെന്റ് ഗ്രൂപ്പും നിര്‍മിക്കാന്‍ ഇതിലൂടെ കഴിയും. കമ്മ്യൂണിറ്റി അംഗങ്ങള്‍ക്ക് ഇഷ്ടമുള്ള വേറെ ഗ്രൂപ്പുകളില്‍ ജോയിന്‍ ചെയ്യാം. പക്ഷേ അഡ്മിന്‍മാര്‍ക്ക് മാത്രമേ കമ്മ്യൂണിറ്റീസ് അനൗണ്‍സ്മെന്റ് ഗ്രൂപ്പ് കൈകാര്യം ചെയ്യാന്‍ സാധിക്കുകയുള്ളൂ. എല്ലാ ഗ്രൂപ്പികളിലെയും അംഗങ്ങളിലേക്ക് മെസെജ് എളുപ്പത്തില്‍ എത്തിക്കാന്‍ ഇത് സഹായിക്കും.അനൗണ്‍മെന്റ് ഗ്രൂപ്പില്‍ അഡ്മിന്‍മാരുടെ മാത്രമേ നമ്ബര്‍ പ്രദര്‍ശിപ്പിക്കൂ എന്ന പ്രത്യേകതയും ഉണ്ട്.