രാജപുരം: കോടോത്ത് ഡോ.അംബേദ്കര്‍ ഗവ.ഹയര്‍ സെക്കന്ററി സ്‌കൂളിലെ 1992-93 വര്‍ഷത്തെ ആദ്യ എസ്.എസ്.എല്‍.സി ബാച്ച് പൂര്‍വ്വ വിദ്യാര്‍ത്ഥികളാണ് പൊതു വിദ്യാലയ മികവിനായി വിദ്യാലയത്തിന് ഇലക്ട്രിക് ബെല്‍ സ്ഥാപിച്ച് കൈമാറിയത്. സ്‌കൂളിന്റെ പരമ്പരാഗത രീതിയിലുള്ള ബെല്‍ എല്ലാ ക്ലാസ്സുകളിലും എത്തുന്നില്ല എന്ന പരാതി ഉയര്‍ന്നപ്പോള്‍ ബാച്ചിന്റെ പൂര്‍വ്വ വിദ്യാര്‍ത്ഥി സംഗമത്തില്‍ അന്നത്തെ പ്രധാനാധ്യാപകനായിരുന്ന വിശ്വംഭരന്‍ മാഷിന്റെ നിര്‍ദ്ദേശം എസ്.എസ്.എല്‍.സി. ആദ്യ ബാച്ച് പൂര്‍വ്വ വിദ്യാര്‍ത്ഥിയും നിലവിലെ എസ്.എം.സി ചെയര്‍മാനുമായ ബിജുമോന്‍ കെ.ബിയും സഹപാഠികളും ചേര്‍ന്ന് സ്‌കൂളിന്റെ ചിരകാല സ്വപ്നം സാക്ഷാത്കരിക്കുകയുമായിരുന്നു.
ബിജുമോന്‍ കെ.ബിയോടൊപ്പം ബാബുദാസ് കോടോത്ത്, ഗണേശന്‍. പി, സുരേഷ്, മുരളീധരന്‍ എന്നിവര്‍ ബാച്ചിനെ പ്രതിനിധീകരിച്ച് ബെല്‍ സ്‌കൂളിന് സമര്‍പ്പിച്ചു. ഹെഡ്മിസ്ട്രസ് ബെല്‍ ഏറ്റുവാങ്ങി. പൊതുവിദ്യാഭ്യാസ സംരക്ഷണ യജ്ഞത്തിന് കരുത്താകുന്ന ഇത്തരം മാതൃകകള്‍ പൂര്‍വ്വ വിദ്യാര്‍ത്ഥികള്‍ തുടരേണ്ടതുണ്ട്. ആദ്യ എസ്.എസ്.എല്‍.സി ബാച്ചിന് സ്‌കൂളിന്റെ നന്ദി ഹെഡ്മിസ്ട്രസ് അറിയിച്ചു. പി.ടി.എ പ്രസിഡണ്ട് സൗമ്യ വേണുഗോപാല്‍ അധ്യക്ഷത വഹിച്ച ചടങ്ങില്‍ പ്രിന്‍സിപ്പാള്‍ രത്‌നാവതി. എ സ്വാഗതം പറഞ്ഞു.