തൃശ്ശൂര്‍: അതിരപ്പിള്ളിയിലെ സില്‍വര്‍ സ്റ്റോം വാട്ടര്‍ തീം പാര്‍ക്ക് അടച്ചിടാന്‍ ആരോഗ്യമന്ത്രി നിര്‍ദ്ദേശം നല്‍കി. പാര്‍ക്കില്‍ കുളിച്ച വിദ്യാര്‍ത്ഥികള്‍ക്ക് എലിപ്പനി സ്ഥിരീകരിച്ചിരുന്നു. ഇതിന് പിന്നാലെയാണ് സില്‍വര്‍ സ്റ്റോം താല്‍ക്കാലികമായി അടച്ചുപൂട്ടാന്‍ മന്ത്രി വീണ ജോര്‍ജ് നിര്‍ദ്ദേശം നല്‍കിയത്.
എറണാകുളത്ത് നിന്ന് വിനോദയാത്രയ്‌ക്കെത്തിയ രണ്ട് പേര്‍ക്ക് എലിപ്പനി സ്ഥിരീകരിച്ചതിനെ തുടര്‍ന്ന് അതിരപ്പിള്ളി സില്‍വര്‍ സ്റ്റോം വാട്ടര്‍ തീം പാര്‍ക്കില്‍ ആരോഗ്യ വിഭാഗം പരിശോധന നടത്തിയിരുന്നു. തൃശ്ശൂര്‍ ഡെപ്യൂട്ടി ഡിഎംഒയുടെ നേതൃത്വത്തിലായിരുന്നു പരിശോധന. വാട്ടര്‍ തീം പാര്‍ക്കിലെ വെള്ളത്തിന്റെ സാമ്പിള്‍ ആരോഗ്യ വിഭാഗം ശേഖരിച്ചു. പനി ബാധിക്കാന്‍ ഇടയായ സാഹചര്യമാണ് പരിശോധിക്കുന്നത്. പക്ഷെ എലിപ്പനി ശ്രോതസ്സ് കണ്ടെത്തുക ബുദ്ധിമുട്ടെന്നാണ് ആരോഗ്യ വിഭാഗം പറയുന്നത്.
പതിനേഴാം തീയതിക്ക് ശേഷം അതിരപ്പിള്ളി സില്‍വര്‍ സ്റ്റോം വാട്ടര്‍ തീം പാര്‍ക്ക് സന്ദര്‍ശിച്ചവരുടെ വിവരങ്ങള്‍ ശേഖരിക്കാന്‍ ആരോഗ്യ വകുപ്പ് നടപടി തുടങ്ങിയിട്ടുണ്ട്. ഗൂഗിള്‍ ഫോം വഴിയാണ് സന്ദര്‍ശകരുടെ വിവരങ്ങളെടുക്കുക. സംഭവത്തില്‍ ഡിഎംഒ റിപ്പോര്‍ട്ട് തേടുകയും ചെയ്തിരുന്നു.