ശാസ്താംകോട്ട: കാട്ടുപന്നിയുടെ ആക്രമണത്തില്‍ എട്ടുവയസ്സുകാരി ഉള്‍പ്പെടെ മൂന്നുപേര്‍ക്ക് പരിക്ക്. ശൂരനാട് വടക്ക് പടിഞ്ഞാറ്റംമുറി സ്വദേശികളായ സ്മിതാ ഭവനത്തില്‍ ചെല്ലപ്പന്‍ പിള്ള (67), ആര്യ ഭവനത്തില്‍ രവി (55), പോരുവഴി ഒന്‍പതാം വാര്‍ഡില്‍ ചാങ്ങയില്‍ക്കാവ് വിജീഷ് ഭവനത്തില്‍ സിദ്ധ എന്നിവര്‍ക്കാണ് പരിക്കേറ്റത്.
ഇന്നലെ വൈകുന്നേരമാണ് സംഭവം. ചെല്ലപ്പന്‍ പിളള, രവി എന്നിവര്‍ക്ക് മുഖത്തും കാല്‍മുട്ടിനുമാണ് പരിക്കേറ്റത്. ടൂഷന്‍ ക്ലാസ് കഴിഞ്ഞ് വീട്ടിലേക്ക് വരുന്നതിനിടെ വൈകുന്നേരം ആറിന് കോയിപ്പുറത്തുവെച്ചാണ് സിദ്ധയെ പന്നി ആക്രമിച്ചത്. സിദ്ധയെ ഇടിച്ചിട്ടശേഷം പന്നി ഓടി മറയുകയായിരുന്നു.
തുടര്‍ന്ന്, കാട്ടുപന്നിയുടെ ആക്രമണത്തില്‍ പരിക്കേറ്റ മൂന്നുപേരെയും ശാസ്താംകോട്ട താലൂക്ക് ആശുപത്രിയില്‍ പ്രവേശിപ്പിച്ചു. പിന്നീട് വിദഗ്ധ ചികിത്സയ്ക്കായി രവിയെയും ചെല്ലപ്പന്‍ പിള്ളയെയും വണ്ടാനം മെഡിക്കല്‍ കോളേജ് ആശുപത്രിയിലേക്ക് മാറ്റി.