തലശ്ശേരി: തലശ്ശേരിയില്‍ ബ്രൗണ്‍ഷുഗറുമായി നാലുപേര്‍ അറസ്റ്റില്‍. പാപ്പിനിശ്ശേരി അഞ്ചാംപീടികയിലെ മക്കാരക്കാരന്റവിട മുഹമ്മദ് ഫാസില്‍ (27), ചാലാട് വായനശാലക്ക് സമീപം ആലിയാസ് ഹൗസില്‍ അഷ്‌റഫ് (26), ചാലാട് ചാത്തോത്ത് ഹൗസില്‍ ദീപക് (32), ചാലാട് പോച്ചപ്പില്‍ ഹൗസില്‍ ടി. മംഗള്‍ (26) എന്നിവരാണ് അറസ്റ്റിലായത്.
വ്യാഴാഴ്ച രാത്രിയാണ് സംഭവം. പൊലീസ് പിടികൂടിയപ്പോള്‍ സംഘത്തിലെ അഷ്‌റഫ് കാറില്‍ തലയിടിച്ച് സ്വയം പരിക്കേല്‍പിച്ചതായി പൊലീസ് പറഞ്ഞു. പ്രതികള്‍ ഉപയോഗിച്ച ഡല്‍ഹി രജിസ്‌ട്രേഷന്‍ കാറും പൊലീസ് കസ്റ്റഡിയിലെടുത്തിട്ടുണ്ട്. 17.990 ഗ്രാം ബ്രൗണ്‍ഷുഗര്‍ ഇവരില്‍ നിന്ന് പിടിച്ചെടുത്തു. തലശ്ശേരി പൊലീസ് സ്റ്റേഷന് പരിസരത്ത് വാഹന പരിശോധനക്കിടയില്‍ എസ്.ഐ മിലേഷും സംഘവുമാണ് ഇവരെ പിടികൂടിയത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.