വിംഗ് കമാന്‍ഡര്‍ അഭിനന്ദന്‍ വര്‍ധമാനെ അപമാനിച്ച് പാകിസ്താന്‍ സൂപ്പര്‍ ലീഗ്. പിഎസ്എലിന്റെ സ്ട്രറ്റേജിക് ഇടവേളയില്‍ അഭിനന്ദന്റെ ചിത്രം ബിഗ് സ്‌ക്രീനില്‍ പ്രദര്‍ശിപ്പിച്ചാണ് പിഎസ്എല്‍ പ്രകോപനം നടത്തിയത്. 2019 ഫെബ്രുവരിയില്‍ പാകിസ്താന്റെ എഫ്16 വിമാനം വെടിവച്ച് വീഴ്ത്തിയ അഭിനന്ദനെ പാക് സേന പിടികൂടിയിരുന്നു. പാക് സേനയുടെ പിടിയിലായിരിക്കെ അഭിനന്ദന്‍ ചായ കുടിക്കുന്ന വിഡിയോ അധികൃതര്‍ തന്നെ പുറത്തുവിട്ടു. ഈ വിഡിയോയില്‍ നിന്നുള്ള ദൃശ്യമാണ് പിഎസ്എല്‍ ബിഗ് സ്‌ക്രീനില്‍ തെളിഞ്ഞത്.
ഫെബ്രുവരി 27ന് ലാഹോര്‍ ക്വലാന്‍ഡേഴ്‌സും ഇസ്ലാമാബാദ് യുണൈറ്റഡും തമ്മില്‍ നടന്ന മത്സരത്തിനിടെയായിരുന്നു സംഭവം. 2019 ഫെബ്രുവരി 27നാണ് അഭിനന്ദന്‍ പക സേനയുടെ പിടിയിലാവുന്നത്. ഇതുമായി ബന്ധപ്പെടുത്തിയാണ് പിഎസ്എല്‍ അഭിനന്ദന്റെ ചിത്രം പ്രദര്‍ശിപ്പിച്ചത്. ട്വിറ്ററില്‍ പിഎസ്എലിനും പിസിബിക്കുമെതിരെ വ്യാപക വിമര്‍ശനങ്ങളാണ് നടക്കുന്നത്.
പാകിസ്താന്‍ സേനയുടെ പിടിയിലായിരിക്കെ അഭിനന്ദന്‍ സംസാരിക്കുന്നതിന്റെ ഒരു വിഡിയോ അന്ന് പുറത്തുവന്നിരുന്നു. പാക് സേനാംഗങ്ങള്‍ തന്നോട് മാന്യമായാണ് പെരുമാറുന്നതെന്നും ആള്‍ക്കൂട്ടത്തില്‍ നിന്ന് തന്നെ അവര്‍ രക്ഷിച്ചു എന്നും അദ്ദേഹം വിഡിയോയില്‍ പറഞ്ഞിരുന്നു. തുടര്‍ന്ന് ചായ എങ്ങനെയുണ്ടെന്ന് ഒരാള്‍ ചോദിക്കുമ്പോള്‍, ‘ചായ നല്ലതാണ്. നന്ദി’ എന്ന് അഭിനന്ദന്‍ മറുപടി പറയുകയും ചെയ്തു. ഫെബ്രുവരി 27 നു പിടിയിലായ അദ്ദേഹത്തെ മാര്‍ച്ച് ഒന്നിന് പാകിസ്താന്‍ വിട്ടയച്ചു.