പ്രാദേശിക സംസ്‌കാരത്തിന്റേയും ജീവിതങ്ങളുടേയും കഥ പറയുന്ന വേറിട്ട പ്രദര്‍ശനവുമായി ഫെഡറല്‍ ബാങ്ക്. ചെന്നൈയിലെ അഡയാര്‍ ശാഖയിലാണ് പ്രാദേശിക തനിമയുടെ പ്രദര്‍ശന ഗാലറിയാക്കിയൊരുക്കി വേറിട്ട ക്യാംപയിന് ബാങ്ക് തുടക്കം കുറിച്ചത്. പ്രദേശവാസികളില്‍ നിന്നും ബാങ്കു ജീവനക്കാര്‍ നേരിട്ട് ശേഖരിച്ച നൂറോളം അനുഭവകഥകളില്‍ നിന്ന് തെരഞ്ഞെടുത്ത 40 കഥകളും കഥാപാത്രങ്ങളുടെ ചിത്രങ്ങളും ശാഖാ അങ്കണത്തില്‍ പ്രദര്‍ശിപ്പിച്ചിരിക്കുന്നു. ‘ഐ ആം അഡയാര്‍, അഡയാര്‍ ഈസ് മി’ എന്നു പേരിട്ടിരിക്കുന്ന ക്യാംപയിന് ഇന്ത്യയിലെ ബാങ്കിങ് രംഗത്ത് തീര്‍ത്തും പുതുമയാര്‍ന്നതാണ് . അഡയാറിലെ ജനങ്ങളുടെ പോരാട്ടങ്ങളും വിജയങ്ങളും, അഡയാറിന്റെ സവിശേഷതകളുമെല്ലാം പ്രതിഫലിപ്പിക്കുന്നതാണ് ചുവരുകളിലെ പെയിന്റിങുകള്‍.
ക്യാംപയിന്റെ ഭാഗമായി അഡയാറിലുടനീളം വിവിധ ഷോപ്പുകളില്‍ അഡയാര്‍ ഫെഡറല്‍ എന്ന പേരില്‍ ബ്രാന്‍ഡഡ് ബോര്‍ഡുകള്‍ പ്രദര്‍ശിപ്പിച്ചിട്ടുണ്ട്. കൂടാതെ, ബ്രാന്‍ഡ് ചെയ്ത നൂറിലേറെ ഓട്ടോറിക്ഷകളും നഗരത്തില്‍ ഓടിക്കൊണ്ടിരിക്കുന്നു.
”അഡയാറിലെ ജനങ്ങളുടെ ജീവിതവും ഓര്‍മ്മകളും ആഘോഷിക്കാന്‍ ബാങ്ക് ഒരുക്കിയ സവിശേഷ സംരംഭമാണ് ‘ഐ ആം അഡയാര്‍, അഡയാര്‍ ഈസ് മി.’ വലിയ സ്വപ്നങ്ങള്‍ കാണാനും അവ സാക്ഷാത്കരിക്കാനും പ്രോത്സാഹിപ്പിക്കുന്ന ബാങ്കാണ് ഫെഡറല്‍ ബാങ്ക്. സഹാനുഭൂതിയോടെയുള്ള സേവനമാണ് മികച്ച സാമ്പത്തിക വളര്‍ച്ചയുടെ ഇന്ധനമായി മാറുക. അഡയാറിലെ ജനങ്ങള്‍ അവരുടെ ജീവിതവും കഥകളും അനുഭാവപൂര്‍വമാണ് ഞങ്ങളുമായി പങ്കുവച്ചത്. അവരുടെ മുഖങ്ങളെല്ലാം അഡയാറിലെ ദൈനംദിന ജീവിതവും യാത്രകളും സന്തോഷവും രേഖപ്പെടുത്തുന്നു,” ഫെഡറല്‍ ബാങ്ക് ചീഫ് മാര്‍ക്കറ്റിങ് ഓഫീസര്‍ എം വി എസ് മൂര്‍ത്തി പറഞ്ഞു.
ഇടപാടുകള്‍ക്കപ്പുറം ജനങ്ങളുമായി വ്യക്തിപരമായി നേരിട്ട് ഇടപഴകുന്ന ഒരു ബന്ധം ഈ സവിശേഷ ക്യാംപെയിനിലൂടെ നേടിയെടുക്കാന്‍ ബാങ്കിനു സാധിച്ചു. ജനങ്ങള്‍ക്ക് കൂടുതല്‍ പ്രാമുഖ്യം നല്‍കുന്ന ബാങ്കിന്റെ, പ്രാദേശിക സംസ്‌കാരവുമായും ഇഴുകിച്ചേര്‍ന്നുള്ള ഈ സമീപനത്തിന് ഏറെ സ്വീകാര്യതയും ലഭിക്കുന്നുണ്ട് . പ്രാദേശിക സമൂഹവുമായി വൈകാരികമായ ഒരു ബന്ധം സ്ഥാപിക്കാന്‍ കൂടി ഈ ക്യാംപയിന് ലക്ഷ്യമിടുന്നു.
ജൂണ്‍ 3 നു തുടങ്ങിയ പ്രദര്‍ശനം രാവിലെ 10 മുതല്‍ വൈകീട്ട് 6 വരെ രണ്ടാഴ്ചക്കാലത്തേക്ക് ഉണ്ടാവുന്നതാണ്.