ഉപഭോക്തൃ സേവനം മെച്ചപ്പെടുത്താന്‍ നിരവധി തരത്തിലുള്ള ഫീച്ചറുകള്‍ അവതരിപ്പിക്കുന്ന പ്ലാറ്റ്‌ഫോമാണ് വാട്‌സ്ആപ്പ്. വാട്‌സ്ആപ്പില്‍ നമ്പര്‍ സേവ് ചെയ്യാതെ സന്ദേശമയക്കാനുള്ള ഫീച്ചര്‍ നേരത്തെ തന്നെ കമ്ബനി അവതരിപ്പിച്ചിരുന്നു. എന്നാല്‍, ഭൂരിഭാഗം ഉപഭോക്താക്കള്‍ക്കും ഈ ഫീച്ചറിനെ കുറിച്ച് കൃത്യമായ ധാരണയില്ല. മിക്ക ആളുകളും ഫോണ്‍ കോണ്‍ടാക്ടില്‍ നമ്പര്‍ സേവ് ചെയ്തശേഷം സന്ദേശങ്ങള്‍ അയക്കാറാണ് പതിവ്. എന്നാല്‍, പതിവ് രീതികളില്‍ നിന്നും വ്യത്യസ്ഥമായി വളരെ എളുപ്പത്തില്‍ തന്നെ നമ്പര്‍ സേവ് ചെയ്യാതെ ആശയവിനിമയം നടത്താനുള്ള അവസരമാണ് വാട്‌സ്ആപ്പ് ഒരുക്കുന്നത്.
വാട്‌സ്ആപ്പിലെ സെര്‍ച്ച് ബാറില്‍ നമ്പര്‍ ടൈപ്പ് ചെയ്ത ശേഷം സന്ദേശം അയക്കാനുള്ള ഫീച്ചറാണ് ഇത്തവണ വികസിപ്പിച്ചത്. ആവശ്യമായ ഫോണ്‍ നമ്പര്‍ കോപ്പി ചെയ്ത ശേഷം, ചാറ്റ് ലിസ്റ്റിന്റെ സെര്‍ച്ച് ബാറില്‍ പേസ്റ്റ് ചെയ്യാവുന്നതാണ്. നമ്പര്‍ ലിസ്റ്റില്‍ ഉണ്ടെങ്കില്‍ വാട്‌സ്ആപ്പ് അത് കാണിക്കും. ചാറ്റ് ബട്ടണിന് താഴെയാണ് ഇത് തെളിയുക. അല്ലാത്തപക്ഷം വലതുവശത്തുള്ള ചാറ്റ് ബട്ടണില്‍ ക്ലിക്ക് ചെയ്ത് ആശയവിനിമയം നടത്താന്‍ കഴിയുന്ന വിധമാണ് ക്രമീകരണം. നിരവധി ഉപഭോക്താക്കള്‍ക്ക് ഉപകാരപ്രദമാകുന്ന ഫീച്ചറാണിത്.