യുവതാര നിരയില്‍ ഏറെ പ്രേക്ഷക പിന്തുണയുള്ളതും ആരാധകരുള്ളതുമായ ഒരു നടന്‍ ആണ് നസ്ലിന്‍. തണ്ണീര്‍മത്തന്‍ ദിനങ്ങള്‍, സൂപ്പര്‍ ശരണ്യ പ്രേമലു എന്നീ സൂപ്പര്‍ഹിറ്റ് ചിത്രങ്ങള്‍ക്ക് ശേഷം നസ്ലിനെ കേന്ദ്രകഥാപാത്രമാക്കി ഗിരീഷ് എ.ഡി സംവിധാനം ചെയ്യുന്ന ‘ഐ ആം കാതലന്‍’ എന്ന സിനിമയുടെ ട്രെയിലര്‍ പുറത്ത്.
ഇതുവരെ റൊമാന്റിക് കോമഡി വിഭാഗത്തില്‍ പെടുന്ന ചിത്രങ്ങളാണ് ഈ കൂട്ടുകെട്ടില്‍ നിന്ന് കണ്ടെതെങ്കില്‍, ‘ഐ ആം കാതലന്‍’-ല്‍ വളരെ ത്രില്ലിങ് ആയ മുഹൂര്‍ത്തങ്ങള്‍ക്കും പ്രാധാന്യം ഉണ്ടെന്ന് ട്രെയിലര്‍ സൂചിപ്പിക്കുന്നു. ചിത്രത്തില്‍ ദിലീഷ് പോത്തന്‍, ലിജോമോള്‍, ടി.ജി രവി, സജിന്‍, വിനീത് വാസുദേവന്‍, വിനീത് വിശ്വം എന്നിവരാണ് മറ്റുപ്രധാന കഥാപാത്രങ്ങളെ അവതരിപ്പിക്കുന്നത്. ചിത്രത്തിന്റെ ഫസ്റ്റ് ലുക്ക്, സെക്കന്റ് ലുക്ക് പോസ്റ്ററുകള്‍ നേരത്തെ തന്നെ ശ്രദ്ധ നേടിയിരുന്നു. അനിഷ്മ ആണ് നായിക.
പ്രശസ്ത നടനായ സജിന്‍ ചെറുകയില്‍ ആണ് ചിത്രത്തിന് തിരക്കഥയൊരുക്കിയിരിക്കുന്നത്. നവംബര്‍ എഴിനാണ് ചിത്രത്തിന്റെ റിലീസ്. ശ്രീ ഗോകുലം മൂവീസിന്റെ ബാനറില്‍ ഗോകുലം ഗോപാലനും, പൂമരം, എല്ലാം ശരിയാകും, ഓ മേരി ലൈല എന്നീ ചിത്രങ്ങള്‍ക്ക് ശേഷം ഡോ. പോള്‍സ് എന്റര്‍ടെയിന്മെന്റസിന്റെ ബാനറില്‍ ഡോ. പോള്‍ വര്‍ഗീസ്, കൃഷ്ണമൂര്‍ത്തി എന്നിവരുമാണ് ചിത്രം നിര്‍മിച്ചിരിക്കുന്നത്. സഹനിര്‍മ്മാണം ടിനു തോമസ് (ഹിറ്റ്‌മേക്കേഴ്സ് എന്റര്‍ടെയിന്‍മെന്റ്‌സ്). ഡ്രീം ബിഗ് ഫിലിംസ് ആണ് ചിത്രം കേരളത്തിലെ തിയറ്ററുകളില്‍ വിതരണം ചെയ്യുന്നത്.