ബന്തടുക്ക: വൈ എം സി എ അഖിലലോക പ്രാര്‍ത്ഥനാവാരാചരണത്തിന്റെ ഭാഗമായുള്ള ജില്ലാതല പ്രാര്‍ത്ഥനാവാരാചരണം ഇന്നലെ ബന്തടുക്കയില്‍ തുടങ്ങി. വാരാചരണത്തിന്റെ ജില്ലാതല ഉദ്ഘാടനം പടുപ്പ് വൈ എം സി എ ഹാളില്‍ സൗത്ത് വെസ്റ്റ് ഇന്ത്യാ റീജിയന്‍ വൈസ് ചെയര്‍മാന്‍ മാനുവല്‍ കുറിച്ചിത്താനം നിര്‍വ്വഹിച്ചു. കാസര്‍കോട് ജില്ലാ ചെയര്‍മാന്‍ സണ്ണി മാണിശേരി അധ്യക്ഷത വഹിച്ചു. പടുപ്പ് സെന്റ് ജോര്‍ജ് പള്ളി വികാരി ഫാ.തോമസ് പാമ്പക്കല്‍ അനുഗ്രഹപ്രഭാഷണം നടത്തി. മരണപ്പെട്ട വൈ എം സി എ ഡയറക്ടര്‍ബോര്‍ഡ് അംഗമായിരുന്ന തടത്തില്‍ ജോസിന്റെ ഛായാചിത്രം പടുപ്പ് പള്ളി അസിസ്റ്റന്റ് വികാരി ഫാ.സെബാസ്റ്റ്യന്‍ തെങ്ങുംപള്ളി അനാഛാദനം ചെയ്തു.
മിഷന്‍ ആന്റ് ഡവലപ്പ്‌മെന്റ് സ്റ്റാന്റിംങ് കമ്മറ്റി ജില്ലാ കണ്‍വീനര്‍ പി.സി.ബേബി പ്രാര്‍ത്ഥനാവാരാചരണ സന്ദേശം നല്‍കി. ജില്ലാ വൈസ് പ്രസിഡണ്ട് അജീസ് പറയിടം, മുന്‍ സബ് റീജിയണ്‍ ചെയര്‍മാന്‍മാരായ സാബു പതിനെട്ടില്‍, ടോംസണ്‍ടോം, ജനറല്‍ കണ്‍വീനര്‍ സി.എം.ബൈജു, വനിതാഫോറം യൂനിറ്റ് ചെയര്‍പേഴ്‌സണ്‍ സുമ സാബു, സിസ്റ്റര്‍ ഡെയ്‌സി, സിസ്റ്റര്‍ സുമ, ശോഭ തടത്തില്‍, ടോണി പള്ളുരുത്തി, ജെസി ജോസ് അറയ്ക്കപറമ്പില്‍ എന്നിവര്‍ സംസാരിച്ചു. യൂണിറ്റ് വൈസ് പ്രസിഡണ്ട് സാബു തോമസ് സ്വാഗതവും സെക്രട്ടറി സാജു മഠത്തുംകുടി നന്ദിയും പറഞ്ഞു. 16 ന് വൈകീട്ട് കാലിച്ചാനടുക്കം വൈ എം സി എയില്‍ പ്രാര്‍ത്ഥനാവാരാചരണം സമാപിക്കും.
ജോര്‍ജ് വില്ല്യംസ് എന്ന ചെറുപ്പക്കാരന്‍ ഇംഗ്ലണ്ടില്‍ 1844 ജൂണ്‍ 6 ന് സമാനചിന്താഗതിക്കാരായ 11 യുവാക്കളോടൊപ്പം പ്രാര്‍ത്ഥിച്ച് തുടങ്ങിയതാണ് വൈ എം സി എ പ്രസ്ഥാനം. ഇതിന്റെ സ്മരണയിലാണ് വൈ എം സി എ എല്ലാ കൊല്ലവും ലോകം മുഴുവന്‍ നവംബര്‍ രണ്ടാംവാരം പ്രാര്‍ത്ഥനാവാരമായി ആചരിക്കുന്നത്.