രാവണീശ്വരം : രാവണീശ്വരം ഗവ ഹയര്‍ സെക്കന്‍ഡറി സ്‌കൂളില്‍ വെച്ച് നടന്ന ബേക്കല്‍ ഉപജില്ലാ കലോത്സവത്തില്‍ ഓവറോള്‍ ചാമ്പ്യന്‍ഷിപ്പ് നേടിയ കുട്ടികളെയും ദേശീയ തലത്തില്‍ തൈക്കോണ്‍ ഡോ സബ് ജൂനിയര്‍ പെണ്‍കുട്ടികളുടെ 22 കി.ഗ്രാം വിഭാഗത്തില്‍ ബ്രോണ്‍സ് മെഡല്‍ നേടിയ വൈഗ ഷൈജു, സംസ്ഥാന കായിക മേളയില്‍ തൈക്കോണ്‍ഡോ സീനിയര്‍ ആണ്‍കുട്ടികളുടെ 55 കിലോഗ്രാം വിഭാഗത്തില്‍ സ്വര്‍ണ്ണ മെഡല്‍ നേടിയ ആദര്‍ശ് സിവി, സീനിയര്‍ പെണ്‍കുട്ടികളുടെ 52 കി.ഗ്രാം തൈക്കോണ്‍ഡോയില്‍ രണ്ടാം സ്ഥാനം നേടിയ ശിവ തീര്‍ത്ഥ വി, സീനിയര്‍ ഫുട്‌ബോള്‍ മത്സരത്തില്‍ രണ്ടാം സ്ഥാനം നേടിയ കാര്‍ത്തിക് കെ.പി, സീനിയര്‍ പെണ്‍കുട്ടികളുടെ കമ്പവലി മത്സരത്തില്‍ മൂന്നാം സ്ഥാനം നേടിയ സ്‌നേഹ കെ.സി, സരിത ബി, ബിബിന കെ.സി, ഗൗരിനന്ദന എന്നിവരെയും അനുമോദിച്ചു.
ബേക്കല്‍ ഉപജില്ലാ കലോത്സവത്തില്‍ ഹയര്‍ സെക്കന്ററി വിഭാഗത്തില്‍ ഒന്നാം സ്ഥാനവും എല്‍പി വിഭാഗം, ഓവറോള്‍ വിഭാഗം എന്നിവയില്‍ രണ്ടാം സ്ഥാനവും നേടാന്‍ വിദ്യാലയത്തിന് കഴിഞ്ഞിട്ടുണ്ട്. വാദ്യമേളങ്ങളുടെ അകമ്പടിയോടെ വിദ്യാലയ കവാടത്തില്‍ നിന്നും കുട്ടികളെ സ്‌ക്കൂള്‍ ഭാരവാഹികളും നാട്ടുകാരും ചേര്‍ന്ന് ആനയിച്ചു. തുടര്‍ന്ന് കുട്ടികളെ അസംബ്ലിയില്‍ വച്ച് അനുമോദിച്ചു. പ്രിന്‍സിപ്പാള്‍ കെ ജയചന്ദ്രന്‍, എസ് എം സി ചെയര്‍മാന്‍ എ വി പവിത്രന്‍ പ്രധാന അധ്യാപിക പി ബിന്ദു തുടങ്ങിയവര്‍ നേതൃത്വം നല്‍കി.