പാലക്കുന്ന് : കഴകം ഭഗവതി ക്ഷേത്രത്തില്‍ മറുപുത്തരി ഉത്സവത്തിന് വെള്ളയാഴ്ച്ച രാത്രിയോടെ തുടക്കം കുറിക്കും. ക്ഷേത്രത്തില്‍ കുലകൊത്തി നടത്തുന്ന രണ്ടാമത്തെ ഉത്സവമാണിത്. ധനു സംക്രമനാളില്‍ അതിനായി കുലകൊത്തി. ചൊവ്വാഴ്ച്ച മറുപുത്തരികുറിച്ചു. വെള്ളിയാഴ്ച്ച രാത്രി 9.30 ന് ഭണ്ഡാര വീട്ടില്‍ നിന്ന് തിരുവായുധങ്ങളും തിടമ്പുകളുമായി മേലേ ക്ഷേത്രത്തിലേക്ക് എഴുന്നള്ളത്ത് പുറപ്പെടും. നൂറുകണക്കിന് ഭക്തര്‍ അനുഗമിക്കും. കലശാട്ടും നിവേദ്യ സമര്‍പ്പണവും കഴിഞ്ഞ് മറുപുത്തരി താലവും കലശ എഴുന്നള്ളത്തും നടത്തി താലപ്പൊലി സമര്‍പ്പിക്കും.
രാത്രി 10 ന് നാടന്‍ പാട്ടിലൂടെ പ്രസിദ്ധി നേടിയ പ്രസീത ചാലക്കുടി നയിക്കുന്ന തൃശൂര്‍ പതി ഫോക്ക് ബാന്‍ഡിന്റെ കാളിയം മെഗാ ഷോ നടക്കും. ശനിയാഴ്ച ഉച്ചയ്ക്ക് 3 ന് നടക്കുന്ന തേങ്ങയേറ് കാണാന്‍ നിരവധി പേര്‍ ക്ഷേത്രത്തിലെത്തും. നേര്‍ച്ചയായി സമര്‍പ്പിക്കുന്ന തേങ്ങകള്‍ ചെണ്ടയുടെ താളത്തിനനുസരിച്ച് തേങ്ങാക്കല്ലില്‍ എറിഞ്ഞുടക്കുന്ന അനുഷ്ഠാന ചടങ്ങാണിത്.തൃക്കണ്ണാടപ്പന്റെ പാദം കുളിര്‍പ്പിക്കാനാണിതെന്ന് വിശ്വാസം. വൈകുന്നേരം തിരിച്ചെഴുന്നെള്ളത്തോടെ സമാപനം. തുടര്‍ന്ന് ഭണ്ഡാരവീട്ടില്‍ മറുപുത്തരി സദ്യയും വിളമ്പും.