രണ്ടാം പിണറായി വിജയന്‍ സര്‍ക്കാരിന്റെ നാലാം വാര്‍ഷികാഘോഷത്തിന്റെ സംസ്ഥാനതല ഉദ്ഘാടനം നടക്കുന്ന കാസര്‍കോട് ജില്ലയില്‍ എന്റെ കേരളം പ്രദര്‍ശന വിപണന മേളയുടെ പ്രചരണത്തിന്റെ ഭാഗമായി കാസര്‍കോട് ജില്ലാ ഇന്‍ഫര്‍മേഷന്‍ ഓഫീസ് തയ്യാറാക്കിയ റീല്‍സ് ചീഫ് സെക്രട്ടറി ശാരദാ മുരളീധരന്‍ പ്രകാശനം ചെയ്തു. കാസര്‍കോടിന്റെ സാംസ്‌ക്കാരിക വൈവിധ്യവും വികസനവും ഭാഷാ വൈവിധ്യവും കാണിച്ച് സര്‍ക്കാറിന്റെ വാര്‍ഷികാഘോഷത്തിലേക്ക് ഏവരേയും ക്ഷണിക്കുന്ന വീഡിയോയാണ് റീല്‍സായി പുറത്തിറക്കിയത്. ജില്ലാ കളക്ടര്‍ കെ. ഇമ്പശേഖര്‍, എല്‍.എസ്.ജി.ഡി ജെ.ഡി ജി. സുധാകരന്‍, ജില്ലാ ഇന്‍ഫര്‍മേഷന്‍ ഓഫീസര്‍ എം. മധുസൂദനന്‍ എന്നിവര്‍ സമീപത്തുണ്ടായിരുന്നു. മാലിന്യമുക്തംനവ കേരളം കാസര്‍കോട് ജില്ല മാലിന്യമുക്തമായി പ്രഖ്യാപിക്കുന്ന വേദിയിലാണ് പ്രകാശന ചടങ്ങ് സംഘടിപ്പിച്ചത്.
2025 ഏപ്രില്‍ 21 മുതല്‍ 27 വരെ പിലിക്കോട് കാലിക്കടവ് മൈതാനത്താണ് പ്രദര്‍ശന വിപണന മേള നടക്കുക. 21ന് രാവിലെ 10 മണിക്ക് മുഖ്യമന്ത്രി പിണറായി വിജയന്‍ സംസ്ഥാനതല ഉദ്ഘാടനം നിര്‍വഹിക്കും. ഏപ്രില്‍ 21ന് രാവിലെ 11ന് പടന്നക്കാട് ബേക്കല്‍ ക്ലബില്‍ മുഖ്യമന്ത്രി ജില്ലയിലെ വിവിധ മേഖലകളിലെ പ്രമുഖരുമായി സംവദിക്കും. സര്‍ക്കാരിന്റെ ഒന്‍പതു വര്‍ഷത്തെ നേട്ടങ്ങള്‍ നേരില്‍ കാണാനും സൗജന്യ സേവനങ്ങള്‍ നേടുന്നതിനും തീം പവലിയനുകള്‍, വിപണന സ്റ്റാളുകള്‍, ഫുഡ് കോര്‍ട്ട്, എല്ലാദിവസവും കലാപരിപാടികള്‍ എന്നിവ മേളയില്‍ ഉണ്ടാകും.