രാജപുരം: ആരോരുമില്ലാതെ പുറമ്പോക്കിലെ കുടിലില്‍ കഴിഞ്ഞ 25 വര്‍ഷമായി താമസിച്ചിരുന്നു 75 വയസ്സായ കുട്ടിയമ്മയ്ക്ക് വീടൊരുങ്ങി. കോടോം-ബേളൂര്‍ പഞ്ചായത്തില്‍ 19-ാം വാര്‍ഡില്‍ മുട്ടിച്ചരല്‍ കടല്‍ കാട്ടിപ്പാറയിലെ കുട്ടിയമ്മയ്ക്കാണ് വീട് നല്‍കുന്നത്.
കുട്ടിയമ്മയ്മക്ക് മക്കളോ മറ്റു ബന്ധുക്കളോ നാട്ടിലില്ല. കുറച്ചു വര്‍ഷം മുമ്പ് വരെ പണിക്ക് പോയിരുന്നു. സ്വന്തമായി സ്ഥലമില്ല. താമസിക്കുന്ന സ്ഥലത്തിന് പട്ടയം ലഭിച്ചുമില്ല. പഞ്ചായത്തിന്റെ അതിദാരിദ്ര ലിസ്റ്റില്‍ ഉള്‍പ്പെടുത്തിയതിനു ശേഷം റേഷന്‍ കാര്‍ഡ്, ഇലക്ഷന്‍ ഐഡി കാര്‍ഡ്, എന്നിവ നല്‍കി. അതിനു ശേഷം പെന്‍ഷനും നല്‍കി തുടങ്ങി. സ്വന്തമായി സ്ഥലമില്ലാത്തതിനാല്‍ ലൈഫ് ഭവനപദ്ധതിയില്‍ ഉള്‍പ്പെട്ടിരുന്നില്ല. നിലവിലെ സ്ഥിതി കണ്ടറിഞ്ഞ് വാര്‍ഡ് മെമ്പറുടെ നേതൃത്വത്തില്‍ കമ്മിറ്റി രൂപീകരിച്ച് വീടു നിര്‍മ്മാണം ആരംഭിച്ചിരുന്നു. സംസ്ഥാന സര്‍ക്കാരിന്റെ അതിദാരിദ്ര നിര്‍മ്മാര്‍ജന പദ്ധതി വന്നപ്പോള്‍ അതില്‍ ഉള്‍പ്പെടുത്തി വീട് നിര്‍മ്മിക്കുകയാണ് ചെയ്തത്. താക്കോല്‍ ദാനം ഏപ്രില്‍ 13 ന് രാവിലെ 10 മണിക്ക് ഇ.ചന്ദ്രശേഖരന്‍ എംഎല്‍എ താക്കോല്‍ ദാനം നിര്‍വഹിക്കും.